Шчупак аказаўся большым за сямігадовае дзіця

  Дзесяцікілаграмовы шчупак даўжынёй 1 метр 25 сантыметраў стаў здабычай рыбалова-аматара з г. п. Бешанковічы Яўгена Васільевіча Булыні.
Рыбацкае шчасце чакала яго на рацэ Заходняя Дзвіна, непадалёку ад паромнай пераправы.
  Пасядзець з вудачкай ля вады ці закінуць спінінг Яўген любіць з маленства, вырас ля ракі, таму і на рыбалку ходзіць у асноўным на Дзвіну. А вось так пашанцавала, кажа, упершыню. Вядома, з пустымі рукамі дадому ніколі не вяртаўся, было, што трапілася рыбіна кілаграмаў на сем. А тут такое шчасце!
  “Спачатку, — расказваў Яўген Васільевіч, — калі выцягнуў улоў, нават разгубіўся: што з ім рабіць, куды пакласці? А потым стаў званіць жонцы, каб прынесла сумку”.
  Дома з рыбінай памерыўся іх сын Іван (на здымку), шчупак аказаўся большым за сямігадовае дзіця…