Аматары спорту з Астроўна, Бачэйкава, Будзілава, Віцебска і Бешанковіч сустрэліся ў мінулую суботу
на гарадскім стадыёне.
Адкрытае першынство раёна па пляжным валейболе, арганізатарамі якога выступілі ФСК «Дзвіна» і раённае аб’яднанне прафсаюзаў, сабрала людзей, да спорту неабыякавых, і нават спёка не паўплывала на якасць гульні. Спаборніцтвы на пяску не былі для іх у навіну, спартсмены хутка прыстасоўваліся да ўмоў, разбіраліся ў тактычных пабудовах гульні «2 на 2». Ад матча да матча валейбалісты паляпшалі сваю гульню, імкнуліся не дапускаць памылак, ужываючы магутныя і дакладныя падачы, падманныя хады. Барацьба была ўпартай і эмацыянальнай, але самыя гарачыя моманты чакалі ў фінале.
Вельмі парадаваў дуэт выхаванцаў ДЮСШ, якія не ўпусцілі магчымасці паўдзельнічаць у турніры і паспаборнічаць з дарослымі. Ды і ўвогуле кожная з васьмі каманд выступіла годна, аднак упэўненую перамогу заваявала адна з дзвюх каманд, што выставіла УКП ЖКГ «Бешанковіцкі камунальнік». Дарэчы, і лепшы гулец — Уладзімір Яцук — з каманды чэмпіёнаў. Серабро — за прадстаўнікамі РАНС, бронзу дадому павезлі віцебскія «Зубры».
Турнір завяршыўся, лепшыя каманды ўзнагароджаны. Развітваліся ў прыўзнятым настроі, у прадчуванні хуткай сустрэчы, што, як паведаміў дырэктар фізкультурна-спартыўнага клуба М. С. Галыня, адбудзецца 10 жніўня на пляцоўцы на вуліцы Маладзёжнай. На гэты раз гледачоў чакаюць футбольныя «бітвы» на пяску. Не прапусціце самыя гарачыя моманты гульні!
Марыя САНЬКО.