Максімальную колькасць тэхнікі задзейнічалі сёлета на ўборцы траў першага ўкосу ў сельгаспрадпрыемстве “ААБ Наватар”. Адна з буйнейшых гаспадарак раёна будзе нарыхтоўваць кармы з плошчы 1400 гектараў. Пастаўлена задача назапасіць 9862 тоны кармавых адзінак травяных кармоў, у тым ліку 3650 тон сена, 12200 тон сянажу і 20410 тон сілосу.
На ўмоўную галаву жывёлы ў “ААБ Наватар” разлічваюць нарыхтаваць больш за 32 цэнтнеры кармавых адзінак, увагу надаюць якасці кармоў. Па стане на 7 чэрвеня, у гаспадарцы нарыхтавалі 10 тон сена і 2420 тон сянажу. Пры падрыхтоўцы да кормаўборкі тут не пакінулі без увагі і пытанні аховы працы, тэхнікі беспекі. З удзельнікамі “ зялёнага канвееру” правялі інструктажы, забяспечылі іх спецвопраткай, укамплектавалі тэхніку аптэчкамі, арганізавалі двухразовае гарачае харчаванне.
На касавіцы задзейнічаны маладыя механізатары і земляробы з багатым вопытам. Сярод моладзі, напрыклад, вызначаецца Сяргей Віктаравіч Кульгавы, які ўжо не раз быў лідарам на розных відах работ. У касавіцы ўдзельнічае ўпершыню, на яго рахунку ўжо 2085 тон змяльчонай зялёнай масы. Гэта адзін з лепшых вынікаў у раёне.
Урокі працавітасці малады механізатар бярэ ў старэйшых таварышаў. Такіх як Юрый Іванавіч Якушаў, які працуе ў сельгасвытворчасці ўжо шмат гадоў. Сёлета на касавіцы ён заняты на адвозцы зялёнай масы.
На здымку: С. В. Кульгавы і Ю. І. Якушаў.