Завяршылася рэгістрацыя кандыдатаў у дэпутаты мясцовых Саветаў дэпутатаў 27-га склікання. Па рэспубліцы на 18 тысяч 816 дэпутацкіх мандатаў прэтэндуюць 22 тысячы 784 чалавекі, вылучаныя палітычнымі партыямі, працоўнымі калектывамі, а таксама шляхам збору подпісаў выбаршчыкаў. Сярэдні конкурс на выбарчую акругу складае 1,2. Найбольшая колькасць прэтэндэнтаў на месца – у Мінскім гарадскім Савеце дэпутатаў, тут конкурс дасягнуў 4,7.
На Бешанковіччыне за месца ў раённым Савеце дэпутатаў працягнуць змагацца 36 кандыдатаў у дэпутаты, менавіта столькі кандыдатур прайшло рэгістрацыю ў раённай выбарчай камісіі па выбарах мясцовых Саветаў дэпутатаў 27-га склікання. На дэпутацкі мандат абласнога ўзроўню ад Бешанковіцкай выбарчай акругі прэтэндуюць 3 чалавекі. З моманту рэгістрацыі кандыдатаў у дэпутаты ў краіне стартавала перадвыбарная агітацыя. Яна прадоўжыцца да 22 сакавіка ўключна. Кандыдаты ў дэпутаты маюць права на выступленне па раённым радыё. Кожнаму з іх выдзелена па 3 хвіліны эфірнага часу. Акрамя таго, прэтэндэнты на дэпутацкія мандаты атрымалі магчымасць ствараць выбарчыя фонды для фінансавання расходаў па перадвыбарнай агітацыі.