Цудоўным падарункам напрыканцы года для аматараў здаровага ладу жыцця стала першынство раёна па паўэрліфтынгу. Бешанковіцкія багатыры па традыцыі спаборнічалі ў трэнажорнай зале ФСК «Дзвіна».
Нешматлікая, але надзвычай зацікаўленая публіка падбадзёрвала асілкаў то крыкамі, то жартамі. Так і барацьба ішла весялей, і баявы дух спартсменаў, калі хто з іх не ўзяў заяўленую вагу, не знікаў. Кожнаму хацелася перамагчы. Аднак кубак чэмпіёна заваяваў, як і чакалася, галоўны фаварыт турніру Андрэй Ясінскі. Сярэбраным прызёрам стаў Генадзь Дунец. Сяргей Маціеўскі ўзяў бронзу.
Прыемна, што нашы асілкі ўмеюць радавацца не толькі ўласным перамогам. Нягледзячы на саперніцтва, яны па-сяброўску давалі адзін аднаму парады, падбадзёрвалі ў моманты няўдачы і шчыра віншавалі з паспяховымі выступленнямі. Калі перамагаць – то толькі годна, а прайграваць – прыгожа. Гэта сведчыць, што ўся іх браня з мускулаў і суровасці – шыпы, якія ахоўваюць ружу, за імі хаваецца такое чулае сэрца.