Учора, 30 мая, апошні званок прагучаў для больш чым 17,5 тысячы выпускнікоў школ Віцебскай вобласці. Асаблівым школьнае свята было для 6840 выпускнікоў 11-х класаў, якім сёлета трэба будзе атрымаць атэстат аб сярэдняй адукацыі. Пасведчанне аб базавай адукацыi пасля здачы экзаменаў атрымаюць 10685 падлеткаў. На Бешанковіччыне апошні званок прагучаў для 1420 вучняў. Са школай ў гэты дзень развіталіся 90 выпускнікоў 11-х класаў і 153 навучэнцы 9-х класаў.
Віноўнікі ўрачыстасці – прыбраныя, прыгожыя, трохі сумныя – слухалі апошнія пажаданні з вуснаў педагогаў і бацькоў, атрымалі апошнія школьныя ўзнагароды. Яны чакалі гэтага дня з асаблівым пачуццём. Ужо не дзеці, але яшчэ не дарослыя. Не-не ды навярнуцца на вачах слёзы.
Мабыць, няма нічога больш кранальнага, чым заканчэнне школы. Гэта адзін з тых нешматлікіх момантаў, што запомняцца назаўжды і больш ніколі не паўторацца. Зараз перад чалавекам, які, здавалася б, так нядаўна быў першакласнікам, адкрываюцца ўсе шляхі ў гэтым свеце.
Наперадзе ў юнакоў і дзяўчат чарада сур’ёзных выпрабаванняў і час падвядзення вынікаў шматгадовай вучнёўскай працы – здача экзаменаў: выпускных і, вядома ж, уступных. Хочацца пажадаць усім паспяхова справіцца з імі.
11 чэрвеня ў школах Бешанковіччыны па графіку адбудзецца развітанне са школай і ўручэнне атэстатаў аб сярэдняй адукацыі, а ў 19 гадзін на цэнтральнай плошчы гарпасёлка адзінаццацікласнікі збяруцца на агульнараённы выпускны баль. У гэты дзень будзе абмежаваны продаж спіртных напояў.
…Скончылася выдатная школьная пара, але наперадзе цэлае жыццё, у якім шмат разоў будуць ацэньвацца ўменне заставацца чалавекам, веды, дабрыня, адносіны з людзьмі, значнасць абранай прафесіі. Ацэнкі гэтыя будуць часам больш суровыя, чым школьныя. Галоўнае – па жыцці крочыць аптымістычна.