Паважаныя ветэраны, працаўнікі тылу, вязні фашысцкіх канцлагераў, жыхары блакаднага Ленінграда, землякі!
22 чэрвеня — адна з найбольш трагічных дат у гісторыі нашай краіны. Гэта дзень пачатку Вялікай Айчыннай вайны, самай доўгай і кровапралітнай, якая выпала на долю нашага народа. Нічым нельга змерыць тое гора, якое яна прынесла ў кожную сям’ю. Гібель родных, голад, жахі акупацыі, бамбёжак і артабстрэлаў — няма ў Беларусі, няма ў Бешанковіцкім раёне чалавека, для каго 22 чэрвеня не было б днём асабістага смутку, днём памяці пра сваіх блізкіх, якія аддалі жыццё за мір, за Радзіму, за будучыню дзяцей і ўнукаў.
У гэты дзень мы ўспамінаем загінулых: тых, хто склаў галаву на поле бітвы, у тыле, тых, хто быў закатаваны ў нацысцкіх канцлагерах і засценках… І нават зараз, праз 81 год пасля пачатку вайны, мы працягваем вяртаць гісторыі імёны яе ахвяр і герояў.
Не сумняваемся, што 22 чэрвеня да воінскіх мемарыялаў, брацкіх магіл і помнікаў, размешчаных на Бешанковіччыне, лягуць жывыя кветкі. Мы прыйдзем аддаць даніну памяці продкам, якія заплацілі жыццём за нашу свабоду, і сказаць словы велізарнай падзякі ветэранам. Нізкі паклон і шчырая ўдзячнасць усім, хто прывёў наш народ да Перамогі! Вечная памяць загінулым!
Галіна УНУКОВІЧ, старшыня раённага выканаўчага камітэта.
Генадзь ШВЕДАЎ, старшыня раённага Савета дэпутатаў.