У Клічаве прайшоў маштабны міжрэгіянальны фестываль «Кліч над Вольсай», які аб’яднаў лепшых носьбітаў беларускай культуры.
Удзел у мерапрыемстве прынялі і творчыя калектывы нашага рэгіёна. Дадому яны вярнуліся з высокімі ўзнагародамі — дыпломамі за зберажэнне рэгіянальных народных традыцый.
Сапраўдным упрыгожваннем фестывальнай праграмы стала выступленне народнага калектыву аматараў беларускай нацыянальнай кухні, фальклору і гульні «Бараболя». Яго ўдзельнікі дэманстравалі абрадавыя элементы і шчодра дзяліліся сакрэтамі традыцыйных беларускіх страў. Іх лакацыя прыцягнула мноства гасцей, якія змаглі акунуцца ў атмасферу народнай гасціннасці і паўдзельнічаць у вясёлых самабытных гульнях.
Высокі ўзровень выканаўчага майстэрства паказаў вакальны гурт народнага хора Ульскага сельскага дома культуры. Народныя песні ў іх выкананні рэхам разляталіся над Вольсай, выклікаючы шчырыя апладысменты гледачоў. Артысты ў чарговы раз даказалі, што народная песня кранае сэрцы людзей розных пакаленняў.
Не засталіся без увагі і аматары харэаграфічнага мастацтва. Калектыў пабытовых танцаў «Кружалі» літаральна закруціў у віхуры традыцыйных рухаў усіх прысутных. Іх выступленне вызначалася асаблівай энергетыкай і дакладнасцю перадачы самабытнага малюнка беларускага пабытовага танца.
• Віншуем артыстаў з прызнаннем і жадаем ім новых творчых вышынь!
