Народны калектыў аматараў беларускай нацыянальнай кухні, фальклору і гульні «Бараболя» Вярхоўскага СДК, народны ансамбль народнай песні «Уляначка» Ульскага СДК і народны ансамбль народнай песні «Весялуха» РЦК зноў ярка заявілі пра сябе.
12 верасня «Бараболя» і «Уляначка» прынялі ўдзел у грандыёзным урачыстым мерапрыемстве «Парк збірае сяброў. Мазурына-80». Нашы знаўцы традыцый годна прадставілі сваю творчасць, падарыўшы гасцям свята незабыўныя эмоцыі, звонкія песні і непаўторны каларыт беларускай спадчыны.
Выступленні калектываў сталі сапраўдным упрыгажэннем юбілейнай праграмы парку. Вынікам высокага майстэрства і захавання народнай культуры стала Падзяка ад генеральнага дырэктара ДУ «Цэнтр культуры «Віцебск», члена Савета Рэспублікі Нацыянальнага сходу Рэспублікі Беларусь Глеба Лапіцкага.
***
А праз некалькі дзён калектыў «Бараболя» і ансамбль «Весялуха» сталі часткай мерапрыемстваў «Пад небам адзіным», што адбыліся ў Кастрычніцкім раёне Віцебска і былі прысвечаны Дню народнага адзінства.
Вярхоўскія артысты прывезлі на свята сваю інтэрактыўную праграму «Беларускія забавы» і літаральна скарылі публіку! На пляцоўцы «Бараболі» панавала неверагодная энергетыка: і дарослыя, і дзеці з азартам уключаліся ў даўнія народныя гульні, падпявалі традыцыйныя прыпеўкі і дружна пускаліся ў пляс падчас майстар-класаў па побытавых танцах.
Лепшыя ўзоры беларускай народнай песні ў канцэртнай праграме свята прадставілі ўдзельнікі ансамбля «Весялуха». Іх выступленні гучалі шчыра і кранальна, аб’ядноўваючы гледачоў вакол традыцыйнай беларускай культуры, жывой, самабытнай і аб’ядноўваючай.
Святлана ВАРОШКА.
