Такую тэму для абмеркавання на бацькоўскім сходзе з татамі і матулямі, чые дзеці атрымалі часовы дом у сацыяльным прытулку, абрала кіраўніцтва ўстановы.
З гэтай катэгорыяй грамадзян тут вядзецца мэтанакіраваная прафілактычная работа, таму на сустрэчу з праблемнымі сем’ямі запрасілі супрацоўнікаў праваахоўных органаў, каб размова ў свеце асноўных палажэнняў Дэкрэта №18 атрымалася больш грунтоўнай.
Летась праз рукі выхавацеляў сацыяльнага прытулка прайшло 37 дзяцей. 18 з іх былі вернуты ў біялагічныя сем’і пасля рэабілітацыі бацькоў і выканання прапісанага ім плана мерапрыемстваў. 4 забралі прыёмныя сем’і, 2 – накіраваны ў інтэрнат, яшчэ 2 – у дзіцячую вёску ў Бараўляны.
— Быць бацькамі – цяжкая справа, — адзначыла ў сваёй прамове дырэктар сацыяльнага прытулка Наталля Іванаўна Булыня. – Гэта адказнасць за выхаванне высокіх духоўных і маральных якасцяў у маленькага грамадзяніна краіны. Бо тое, што бацькі змогуць закласці ў сваіх сыноў і дачок у дзяцінстве, праявіцца ў іх дарослым жыцці.
Павучальнай была гутарка з намеснікам пракурора раёна Чэславам Іванавічам Максімовічам. На жыццёвых прыкладах ён імкнуўся данесці бацькам ганебнасць такіх з’яў, як п’янства і дармаедства, рабіў спасылкі на Дэкрэт №18, Канстытуцыю Рэспублікі Беларусь, Кодэкс аб шлюбе і сям’і, нагадаў некаторыя артыкулы сямейнага і крымінальнага права. Асаблівая ўвага сканцэнтравана на правах дзіцяці, пра якія нецвярозыя таты і маці часцей за ўсё забываюцца. А між тым малыя мараць пра залатое дзяцінства.
— Бацькі абавязаны клапаціцца пра выхаванне і здароўе сваіх дзетак, а не наносіць шкоду іх псіхічнаму развіццю, — адзначыў Чэслаў Іванавіч, – абараняць гонар і годнасць чалавека ў асобе дзіцяці, а не зневажаць абразамі і п’янымі лаянкамі. Не ўпрыгожвае чалавека той факт, што дзяржава павінна абараняць дзяцей ад іх бацькоў!
Шчыра гаварыў з праблемнымі сем’ямі і начальнік РАУС Мікалай Віктаравіч Латышаў. Ён адзначыў, што ў 99% выпадкаў бязладдзя ў дамах вінаватая гарэлка. А сваю выснову пацвердзіў лічбамі. Так, летась ад атручвання спіртнымі напоямі пайшлі з жыцця 14 прыдзвінцаў, узровень алкаголю ў іх крыві складаў 6-8 праміляў, што несумяшчальна з жыццём. Частка памерлых – гэта маладыя працаздольныя людзі. Сяброўства з гарэлкай стала прычынай накіравання на лячэнне ў ЛПП 37 прыдзвінцаў. Згадзіцеся, тут ёсць над чым паразважаць. У гутарцы прыняў удзел і інспектар ІСН А. А. Мацуганаў.
Але, напэўна, нічога так не кранае за сэрца, як дзіцячыя просьбы аб здаровым ладзе жыцця, звернутыя да бацькоў. Матулям і татам, якія маюць праблемы з гарэлкай, прапанавалі паслухаць некалькі такіх споведзяў, запісаных на магнітафон. Ад пачутага камянелі сэрцы. Можа гэты крык дзіцячай душы падштурхне бацькоў да актыўных дзеянняў?