У пятніцу дэлегацыя нашага раёна прыняла ўдзел ва ўрачыстай цырымоніі ўшанавання лаўрэатаў звання «Чалавек года Віцебшчыны» за 2010 год, якая адбылася ў Нацыянальным акадэмічным драматычным тэатры імя Я. Коласа. Такое мерапрыемства праходзіць ужо трэці год запар. Упершыню рашэннем абласнога выканаўчага камітэта №893 ад 16 снежня 2009 года быў зацверджаны парадак прысваення ганаровага звання «Чалавек года Віцебшчыны», і за гэты час названы імёны больш як 200 лаўрэатаў. Яшчэ 100 лепшых працаўнікоў прыдзвінскага краю з гарадоў і вёсак заслужылі права насіць гэтае ганаровае званне па выніках работы за 2010 год. Усіх гэтых людзей аб’ядноўваюць высокі прафесіяналізм і бязмежная адданасць сваёй краіне. «Гэта маякі, на якія павінны раўняцца ўсе», — асабліва падкрэсліў старшыня аблвыканкама А. М. Косінец і дадаў, што гэта дзякуючы намаганням і гэтых людзей вобласць змагла дасягнуць летась высокіх вынікаў сацыяльна-эканамічнага развіцця.
У 2010 годзе тэмп росту прамысловай вытворчасці склаў 117% да ўзроўню 2009 года, пабудавана 618 тыс. кв. м жылля. Аднак у бягучым годзе перад намі стаяць яшчэ больш напружаныя задачы. У прыватнасці, тэмп росту вытворчасці прамысловай прадукцыі плануецца на ўзроўні 120%, выпуск інавацыйнай прадукцыі павінен скласці 21% у агульным аб’ёме. Рэнтабельнасць продажу ў прамысловасці — 15%, у аграпрамысловым комплексе — не менш за 10%.
Поспех рэгіёна залежыць ад работы кожнага яго жыхара. Кожны з нас — гэта часцінка сваёй радзімы. Чым больш мы будзем працаваць, тым прыгажэйшым будзе наш край. Таму лепшым прадстаўнікам калектываў разнастайных галін і сфер дзейнасці Аляксандр Мікалаевіч Косінец уручыў дыпломы лаўрэатаў, нагрудныя знакі, грашовую прэмію і кветкі. Для заахвочвання прамыслоўцаў і сельгасвытворцаў, дзеячаў сфер адукацыі, навукі, культуры, мастацтва, аховы правапарадку, паслуг, СМІ, выдавецкай, паліграфічнай дзейнасці, малога і сярэдняга бізнесу, архітэктуры, будаўніцтва, дарожнай гаспадаркі, фізічнай культуры, спорту і турызму, занятасці і сацыяльнай абароны, жыллёва-камунальнай гаспадаркі, энергетыкі, транспарту, камунікацый, аховы здароўя, навакольнага асяроддзя і лясной гаспадаркі, мясцовага кіравання і самакіравання, грамадскіх дзеячаў, абаронцаў Айчыны, лепшых фінансістаў і страхаўшчыкоў аблвыканкамам быў выдзелены амаль мільярд рублёў — па 10 мільёнаў на кожнага. «У 2011 годзе, — адзначыў кіраўнік вобласці, — матывацыя працы ўзрасце, плануецца, што носьбіты звання «Чалавек года Віцебшчыны — 2011″ атрымаюць аўтамабілі!» Апрача таго, бігборды з іх фотаздымкамі на працягу года будуць упрыгожваць населеныя пункты вобласці.
Як і штогод, сярод лаўрэатаў звання «Чалавек года Віцебшчыны» ёсць нашы землякі. Сёлета ў намінацыі «Адукацыя, навука» сярод лепшых працаўнікоў Віцебшчыны значыцца імя дырэктара Ульскага дзяржаўнага прафесійнага ліцэя сельскагаспадарчай вытворчасці імя Л. М. Даватара Аляксандра Антонавіча Пашкевіча, а ў намінацыі «Занятасць, сацыяльная абарона» — інспектара аддзялення сацыяльнай дапамогі на даму Тэрытарыяльнага цэнтра сацыяльнага абслугоўвання насельніцтва Бешанковіцкага раёна Пятра Аляксандравіча Гарбадзея. Разам з іншымі віноўнікамі ўрачыстасці і яны ўзнімаліся на сцэну драмтэатра, у іх адрас таксама гучалі словы шчырай падзякі за самаадданую працу.
Завяршылася ўрачыстая цырымонія ўзнагароджання святочным канцэртам, які падрыхтавалі лепшыя артысты вобласці.
Ларыса ПАДЖАРАЯ.
На здымку: дыплом лаўрэата і нагрудны знак старшыня абласнога выканаўчага камітэта А. М. Косінец уручае дырэктару Ульскага дзяржаўнага прафесійнага ліцэя сельскагаспадарчай вытворчасці імя Л. М. Даватара А. А. Пашкевічу.