Усе мы сёння аб’яднаныя мэтай не дапусціць распаўсюджвання СOVID-19. Кожны ўносіць свой уклад у агульную справу. Хворыя самаізалююцца, здаровыя праводзяць дэзынфекцыю. Асаблівая ўвага і павышаныя патрабаванні прад’яўляюцца да санітарнага стану месцаў агульнага карыстання: магазінаў, грамадскага транспарту і інш. Абмундзіраваныя і ўзброеныя сродкамі дэзынфекцыі працаўнікі прадпрыемстваў і арганізацый прымаюць актыўныя меры санэпідэмічнай бяспекі. Іх барацьба, магчыма, нябачная, але яна ідзе.
Як праводзіцца працэс санітарнай апрацоўкі грамадскага транспарту, расказаў начальнік участка «Бешанковічы» філіяла «Аўтобусны парк №1 г. Віцебска» ААТ «Віцебскаблаўтатранс» А. С. Гушча.
– Штодзень у канцы рабочага дня, калі тэхніка вяртаецца ў парк, яна праходзіць дбайнае мыццё з ужываннем сродкаў дэзынфекцыі. Акрамя гэтага ў працэсе працы на маршруце дадаткова апрацоўваецца шкло, поручні, сцены, падлога, сядзенні, дзверы, пластык ашалёўкі салона, – адзначыў Аркадзь Станіслававіч. – Належны санітарны стан аўтастанцыі падтрымлівае прыбіральнік службовых памяшканняў. Ён жа сочыць і за санітарнай чысцінёй аўтобусаў днём. Увечары, калі транспарт вернецца з лініі, за справу возьмецца прыбіральнік вытворчых памяшканняў. Працаўнікі дзейнічаюць у адпаведнасці з рэгламентам правядзення ўборачных аперацый з мерапрыемствамі па дэзынфекцыі для прадухілення распаўсюджвання вострых інфекцыйных рэспіраторных захворванняў і згодна з інструкцыяй па ўжыванні дэзсродкаў.
Чарговы аўтобус патрапіўся на аўтастанцыі ў сярэдзіне дня. Кіроўца завяршыў рэйс, высадзіў пасажыраў і перагнаў машыну на пляцоўку для адпачынку. У гэты час і праводзіцца санапрацоўка. Мы падаспелі як раз, калі прыбіральнік службовых памяшканняў Р. А. Шакута толькі ўзялася за справу. Чыстая тканіна і антысептык у пульверызатары – яе галоўнае ўзбраенне. Паслядоўна жанчына апрацоўвае ўвесь аўтобус, праходзіць па ўсіх паверхнях, асаблівую ўвагу надае сядзенням і поручням (прадметам непасрэднага кантакту з пасажырамі), а таксама месцу кіроўцы. І так кожны дзень.
– Бывае, за дзень прыбіраю 5-6 аўтобусаў. На аўтастанцыі амаль пуста. Рэдкія цяпер пасажыры, але яны ўсё ж ёсць, і наша задача – зрабіць іх шлях і знаходжанне ў аўтобусе бяспечным, – кажа Раіса Арсеньеўна.
Дэзынфекцыя – адна з мер абароны, далей многае залежыць ад дзеянняў кожнага з нас: выконваць асабістую гігіену (часта і старанна мыць рукі), пазбягаць цесных кантактаў з людзьмі і больш часу праводзіць дома, каб засцерагчы сваіх блізкіх.
Марыя САНЬКО.