Дзень друку – адзіны дзень у годзе, калі прадстаўнікі сродкаў масавай інфармацыі перастаюць ствараць свае шэдэўры, а становяцца героямі публікацый і прымаюць заслужаныя віншаванні. На гэты раз хочацца расказаць на старонках раёнкі пра нашых супрацоўнікаў, для якіх гэты год стаў юбілейным, яны вартыя самых шчырых и цёплых слоў.
Больш за 35 гадоў прысвяціла любімай справе Вольга Сяргееўна Вілюга, аператар электроннага набору і вёрсткі. Без яе, можна так сказаць, «залатых» рук не абыходзіцца амаль ніводны выпуск «Зары». Яна, як сапраўдны прафесіянал сваёй справы, дакладна ведае, што трэба зрабіць, каб наша друкаванае выданне мела эстэтычна прывабны выгляд, каб кожны матэрыял добра чытаўся, а фотаздымкі радавалі позірк.
Знайсці памылку, адрэдагаваць напісаныя творчымі супрацоўнікамі матэрыялы, зверыць, ці ўнесены праўкі на палосах, – з усім гэтым спраўляецца карэктар Ларыса Віктараўна Давыдзенка, якая працуе ў рэдакцыі з 2013 года. Яе трапныя, канструктыўныя прапановы заўсёды дарэчныя.
Несумненна, нам было б немагчыма збіраць цікавыя аператыўныя матэрыялы без вадзіцеля Сяргея Уладзіміравіча Гаралевіча, які заўсёды «на баявым пасту» і ў любую хвіліну гатовы адправіцца ў далёкую дарогу.
Хочацца пажадаць нашым юбілярам, а таксама ўсім супрацоўнікам рэдакцыі «Зары», ветэранам друку, пазаштатным аўтарам, каб у іх жыцці здараліся толькі знамянальныя падзеі! Здароўя вам, дабрабыту, міру і кахання!
Алена МАРОЗАВА.