У мінулую пятніцу ў рамках рэспубліканскай акцыі «Чысты вадаём» неабыякавыя да прыроды землякі прыбіралі ўзбярэжную тэрыторыю вадаёма «Чыстыя пруды» ў райцэнтры. Актыўны ўдзел у гэтым прынялі працаўнікі Бешанковіцкага РГЗ.
– Нам вельмі прыемна, калі на кліч дапамагчы адгукаюцца многія людзі, – адзначыў старшыня раённай арганізацыі ТВВОД С. С. Садыкаў. – Хачу сказаць вялікі дзякуй нашым пастаянным памочнікам і сябрам з газавай службы, менавіта яны з надыходам лета штогод дапамагаюць наводзіць парадак на нашай тэрыторыі.
Купальны сезон у краіне афіцыйна стартаваў 15 мая, але ў сувязі з умовамі надвор’я ён пачнецца крыху пазней. Так што аматарам паныраць і папесціцца на цёпленькім пясочку давядзецца пачакаць. Паводле слоў Сулеймана Садыкавіча, згодна з рашэннем райвыканкама на тэрыторыі раёна адзіным дазволеным месцам для масавага адпачынку застаецца вадаём «Чыстыя пруды».
Таварыства выратавання на водах падрыхтоўку да купальнага сезона пачало загадзя. Сёлета матросам-ратавальнікам выдадзена новая экіпіроўка: атрыманы ласты, маскі, два ратавальныя кругі і ратавальны канец Аляксандрава. Акультурана тэрыторыя, закуплена фарба. Пачаты рамонт лавак, лежакоў і ўрнаў для смецця. Запланавана месца для ўстаноўкі новага ценевіка (работы будуць праводзіцца з дапамогай ПМК-41). Камунальная служба правядзе планавы абкос тэрыторыі. Па просьбах многіх землякоў, на бераг вадаёма завязуць тры машыны пяску.
– Яшчэ адзін немалаважны момант – стэнды, – расказаў С. С. Садыкаў. – Пасля зімы мы цалкам іх абнавілі, пафарбавалі і размясцілі тут карысную і самую актуальную інфармацыю.
Рэгулярна абнаўляюцца наглядныя дапаможнікі, падрыхтаваныя РАНС і РАУС. У іх нагадваюцца правілы паводзін на вадзе і на беразе, а таксама папярэджанні пра забарону курэння, распіцця спіртных напояў і выгулу сабак у нявызначаных для гэтага месцах.
– Мы з нецярпеннем чакаем усіх аматараў прыемна і карысна адпачыць, – адзначыў С. С. Садыкаў. – Хацелася б, каб нашы землякі больш адказна ставіліся да такога баўлення часу, бо адзін няправільны крок можа прывесці да бяды.
Кацярына ПЕТУХОВА.