Як перавесці жывёлу на абноўленыя «кватэры» і чым карміць яе зімой? Пра ўсё гэта думаць трэба зараз. Не дзіва, што ў сельгаспрадпрыемствах Бешанковіччыны працоўныя дні на палях даволі напружаныя.
У атмасферу поўнай паглыбленасці ў працэс нарыхтоўкі кармоў нам пашчасціла трапіць на мінулым тыдні. Героі падзей мяняліся, нібы кадры кінастужкі: наведалі амаль усе сельгасарганізацыі. Была для гэтага і другая нагода – павіншаваць перадавікоў, якія вызначыліся на сяўбе. Яны знайшліся ў кожнай гаспадарцы, але пра гэта раскажам у іншым матэрыяле.
Хвіліна – і ў аб’ектыве фотакамеры з’яўляецца «мішэнь». Фокус, пстрычка – і запаветны кадр, можна сказаць, у «кішэні». Дзеючай асобай аднаго са здымкаў стаў механізатар СУП «Свіціна-ВМК» з 35-гадовым працоўным стажам У. В. Прошчанка. Якую толькі справу ні даручалі Уладзіміру Віктаравічу: адвозіў збожжа на «МАЗе», дастаўляў угнаенні, амаль штогод падчас жніва быў за штурвалам магутнага агракарабля… Зараз назапашвае кармы на «КВК-800». Рухі упэўненыя, звыклыя, тонкасці і нюансы працэсу вывучаны (за столькі гадоў у сельскай гаспадарцы!).
Разам з ім на «МТЗ-3522» з «Silvercut-900» шчыруе Юрый Любачка, на «УЭС-2-250» з «КПР-9» – Анатоль Асташонак. На «МТЗ-82» з граблямі задзейнічаны Андрэй Сімірскі і Міхаіл Пішчэйка. З адвозкай зялёнай масы спраўляецца зладжанае звяно механізатараў: Юрый Галай і Аляксандр Шкялёнак (абодва на «МТЗ-3022»), Аляксандр Воранаў, Уладзімір Юшкоў – на «МТЗ-1221» і на «МАЗе» Мікалай Шут. Нарыхтоўкай сенажу ў палімерную плёнку займаецца Віктар Дарожка на «МТЗ-1523» з «ПП-1250».
Дарэчы, на ўчарашнюю раніцу ў гаспадарцы скошана 115 гектараў траў першага ўкосу, ці 15,6% ад плана, у сховішчы назапашана 954 т сенажу, 31 т – ужо ў палімернай плёнцы.
Марыя САНЬКО.