30 мая ў школах раёна празвінеў апошні званок. У гэтым годзе з-за пандэміі каранавіруса святочныя мерапрыемствы з нагоды заканчэння навучальнага года прайшлі не так, як звычайна. Аддзелам па адукацыі райвыканкама было прынята рашэнне правесці ўрачыстыя лінейкі толькі для навучэнцаў старэйшых класаў. Бо, што ні кажы, развітанне са школай бывае раз у жыцці, і, нягледзячы на няпростую эпідсітуацыю, свята ўсё ж адбылося. Вядома ж, з выкананнем мер бяспекі.
У СШ №2 райцэнтра, напрыклад, арганізавалі дзве лінейкі. Першая – для навучэнцаў 9-х класаў, другая – для 10-11-х. Безумоўна, самым хвалюючым гэты дзень стаў для адзінаццацікласнікаў. Гэта была іх развітальная лінейка, пасля якой ужо не будзе школьных урокаў, хатніх заданняў і вясёлых перамен…. Менавіта для іх гучалі самыя цёплыя і шчырыя словы віншаванняў і пажаданні ад кіраўніцтва школы, класных кіраўнікоў, бацькоў. З не меншым хваляваннем і трапятаннем выходзілі на ўрачыстую лінейку і выпускнікі базавай школы, бо некаторыя з іх таксама выпырхнуць са школьных сцен. Старшакласнікі шчыра дзякавалі сваім педагогам за атрыманыя веды і абяцалі не забываць родную школу.
Па традыцыі падчас лінейкі прайшло ўзнагароджанне навучэнцаў школы, якія на працягу года мелі дасягненні ў вучобе, спорце і творчасці. Часова выконваючы абавязкі начальніка АДАІ РАУС Ю. М. Раманаў нагадаў дзецям і іх бацькам пра неабходнасць захавання Правілаў дарожнага руху.
…І самы ўрачысты момант – апошні званок. Урокі скончыліся, але наперадзе ў выпускнікоў вельмі важны і адказны перыяд – экзамены, цэнтралізаванае тэсціраванне і выбар прафесіі.