Штогод у Беларусі, у тым ліку і ў нашым раёне, з 1 чэрвеня па 15 верасня праваахоўныя органы праводзяць спецыяльны комплекс мерапрыемстваў пад назвай «Мак».
Асноўнай мэтай гэтай праграмы з’яўляецца актывізацыя работы супрацоўнікаў міліцыі па выяўленні і знішчэнні дзікарослых і спецыяльна вырашчаных раслін, якія ўтрымліваюць наркатычныя рэчывы. Гаворка ідзе пра мак і каноплі. Адпаведна асобы, якія займаюцца вырошчваннем названых раслін, прыцягваюцца да адміністрацыйнай і крымінальнай адказнасці.
Пачаўся сезон актыўнага росту раслін, не заўважыць на сваім участку мак або каноплі проста немагчыма. Праваахоўнікі раяць, калі такія маюцца каля вашага дома, на агародзе, неадкладна знішчаць іх. Бо ў выпадку выяўлення міліцыянерамі такіх раслін на прысядзібным участку, на яго ўладальніка будзе складзены адміністрацыйны пратакол паводле артыкула 16.1 (пасеў або вырошчванне забароненых да апрацоўкі раслін ці грыбоў, якія ўтрымліваюць наркатычныя сродкі або псіхатропныя рэчывы) КоАП Рэспублікі Беларусь і наклазены штраф у памеры да 20 базавых велічынь. А за тыя ж дзеянні з мэтай збыту або вырабу наркатычных сродкаў прадугледжана крымінальная адказнасць па артыкуле 329 КК Рэспублікі Беларусь. Яго санкцыі строгія – вінаватаму пагражае штраф або арышт, або абмежаванне волі на тэрмін да трох гадоў, або пазбаўленне волі на той жа тэрмін.
Дарэчы, у рамках правядзення праграмы «Мак» у 2019 годзе ў раёне па артыкуле 16.1 КоАП да адміністрацыйнай адказнасці прыцягнуты 16 грамадзян, на ўчастках якіх выяўлены расліны, што ўтрымліваюць наркатычныя рэчывы.
Міліцыя просіць усіх, каму вядома пра факты вырастання маку або канопляў (у тым ліку ў лясах, на абочынах палёў, дарог, на агародах), а таксама пра асоб, якія маюць дачыненне да незаконнага абароту наркотыкаў, паведамляць пра гэта ў РАУС па тэлефонах: 102, 4-10-02, 4-85-47, 8 (029) 597-59-88. Ананімнасць гарантуецца.
Святлана ВАРОШКА.