У эфіры тэлеканала АНТ міністр спорту і турызму Сяргей Кавальчук падвёў вынікі ІІ Гульняў краін СНД, паведамляе БЕЛТА.
«Мы гэтыя спаборніцтвы правялі адкрытымі. Да нас дадаліся прадстаўнікі 13 краін, 22 краіны прадстаўлены на гэтых Гульнях. Мы змянілі фармат самога мерапрыемства правядзення: не ў адным горадзе, як гэта было ў Казані, а ўсе нашы абласныя цэнтры, плюс тры раённыя цэнтры, горад Мінск прадстаўлены на гэтых спаборніцтвах. Мы выбіраем новыя фарматы правядзення розных спаборніцтваў: чэмпіянатаў у рамках Садружнасці Незалежных Дзяржаў, двухбаковыя фарматы правядзення мерапрыемстваў. Трэці важны аспект — мы не запрашалі ніякіх замежных спецыялістаў. Мы гэта мерапрыемства поўнасцю праводзілі самастойна», — адзначыў Сяргей Кавальчук.
Паводле яго слоў, Гульні краін СНД выклікаюць вялікую цікавасць. «Мы бачым прадстаўніцтва сёння ў многіх відах спорту. Бяром цяжкую атлетыку — і алімпійскія чэмпіёны, і шматразовыя чэмпіёны свету, і чэмпіёны Еўропы прыехалі на гэтыя спаборніцтвы. Не былі б яны цікавыя, я думаю, што іх не было б тут, — падкрэсліў міністр. — Бяром пляжны футбол. Сёння ў васьмёрцы каманд, якія былі на гэтых спаборніцтвах, пяць прадстаўляюць лепшую дваццатку свету. Калі браць самба, то спаборніцтвы, якія праходзілі ў Жлобіне, — фактычна гэта чэмпіянат свету. Паглядзіце, колькі людзей на трыбунах, незалежна ад таго, якія спаборніцтвы — юнацкія, маладзёжныя або дарослыя, трыбуны ў нас перапоўнены».-