Багата на лясныя дары залатая восень. У лясах – грыбы і ягады, таму не дзіўна, што ў зялёныя дубровы і гаі накіроўваюцца няўрымслівыя зборшчыкі лясных дароў.
Белыя грыбы – гэта ўдача грыбніка. Нарыхтоўчыя пункты райпа ахвотна закупляюць іх у насельніцтва і даюць добрую цану – 30 тысяч рублёў за кілаграм. Восеньскі лес багаты і іншымі грыбамі, якія таксама карыстаюцца попытам. Напрыклад, на грузды і апенькі ўстаноўлена цана па 4 тысячы рублёў за кілаграм, на махавікі – па 10 тысяч. З дароў прыроды ў цане і журавіны, здаць ягаду нарыхтоўшчыкам райпа можна па 15 тысяч рублёў за кілаграм.
Акрамя таго, насельніцтва можа рэалізаваць лішнюю сельгаспрадукцыю, вырашчаную на сваіх прысядзібных участках. Райпа пакуль не пачало закладку агародніны ў стабілізацыйны фонд, але закупляе бульбу, буракі, моркву, капусту, цыбулю і часнок для рэалізацыі ў гандлёвай сетцы раёна.