19 чэрвеня інспекцыя па справах непаўналетніх святкуе 85-ю гадавіну з дня заснавання.
Чацвёрты год у інспекцыі па справах непаўналетніх РАУС працуе старшы ўчастковы інспектар Аляксандр Сяргеевіч Адамовіч. Як выхоўваць маладое пакаленне, ён ведае на ўласным вопыце – у яго падрастае сыночак. Разам з Аляксандрам Сяргеевічам на законны і правільны жыццёвы шлях малалетніх правапарушальнікаў настаўляе ўчастковы інспектар ІСН Ніна Аляксандраўна Мілашкіна.
Не памылюся, калі скажу, што супрацоўнік інспекцыі па справах непаўналетніх не толькі міліцыянер, але і псіхолаг, педагог, а недзе і таварыш. Яго задача заключаецца не ў тым, каб пакараць падлетка за правіннасць, а ў тым, каб працягнуць руку дапамогі, каб у будучым з непаўналетняга парушальніка вырас прыстойны грамадзянін. З гэтай мэтай і праводзяцца прафілактычныя мерапрыемствы, падтрымліваецца цеснае супрацоўніцтва са спецыялістамі іншых зацікаўленых служб, ажыццяўляюцца рэйдавыя мерапрыемствы, гутаркі. Інспектары ІСН – частыя госці ў сем’ях, якія знаходзяцца ў сацыяльна небяспечным становішчы.
– Праца з дзецьмі – адказная справа, – кажа А. С. Адамовіч. – Нам даверана галоўнае – дзіцячыя лёсы. Наша праца патрабуе чалавечнасці, педагагічных здольнасцяў, умення знаходзіць агульную мову з падлеткамі. А гэта, я вам скажу, не так ужо і лёгка.
Сапраўды, праз працоўныя будні інспектараў ІСН праходзяць дзясяткі падлеткаў. Кожнага неабходна выслухаць і зрабіць усё магчымае, каб вочы дзіцяці зноў засвяціліся шчасцем і каб бацькоўскія сэрцы перасталі трывожыцца. Таму на службе ў ІСН – толькі тыя людзі, для якіх гэта складаная прафесія стала прызваннем, а «цяжкія» дзеці – уласнымі.
Да такіх, безумоўна, адносіцца У. С. Галдобенка, які прысвяціў службе ў інспекцыі 15 гадоў і цяпер знаходзіцца на заслужаным адпачынку. Яго вопыт – скарбніца для маладых інспектараў. Ён ведае, як знаходзіць падыход да дзяцей!
– Скажу шчыра, што з дарослымі працаваць значна прасцей, – кажа Уладзімір Сцяпанавіч. – Мне ёсць з чым параўноўваць, апошнія тры гады, да выхаду на заслужаны адпачынак, я працаваў у крымінальна-выканаўчай інспекцыі. Бо дзіця, як бы ні правінілася, застаецца дзіцём – безабаронным і слабым…
За эфектыўнае супрацоўніцтва, асабісты ўклад у прафілактыку і спыненне правапарушэнняў сярод непаўналетніх Уладзімір Сцяпанавіч адзначаны Падзякай упраўлення ўнутраных спраў Віцебскага аблвыканкама. Заслужаную ўзнагароду яму ўручыў начальнік РАУС Аляксандр Міхайлавіч Рыбакоў. Папоўніцца і скарбонка ўзнагарод Аляксандра Сяргеевіча Адамовіча. Яго мундзір упрыгожыць юбілейны медаль «100 год Унутраным войскам МУС Рэспублікі Беларусь».