Самая маштабная спартыўная падзея гэтага лета падышла да завяршэння. Урачыстая цырымонія закрыцця ІІ Гульняў краін СНД прайшла ў «Мінск-Арэне». У чаканні маляўнічага шоу на трыбунах арэны сабраліся тысячы гледачоў. І яны не былі расчараваны — для ўдзельнікаў і гасцей спартыўнага свята падрыхтавалі запамінальную і яркую праграму. У «Мінск-Арэне» быў і карэспандэнт БЕЛТА, якому ўдалося адчуць па-сапраўднаму святочную атмасферу і моцную энергетыку, якая панавала на трыбунах і сцэне.
Дзесяць дзён маштабнага спартыўнага форуму праляцелі імкліва і непрыкметна. Здаецца, яшчэ ўчора ў «Мінск-Арэне» адкрылі ІІ Гульні краін СНД, а ўжо сёння яны тут завяршыліся. Спаборніцтвы, якія прайшлі ў дзесяці гарадах нашай краіны, увойдуць у гісторыю як маштабная і знамянальная спартыўная падзея, якая не пакінула абыякавым спартсменаў і балельшчыкаў.
Яшчэ да пачатку святочнай цырымоніі на пляцоўках ля «Мінск-Арэны» пачалі збірацца жыхары і госці сталіцы. Іх забаўлялі роставыя лялькі, з якімі ахвотна фатаграфаваліся не толькі дзеці, але і дарослыя. Надвор’е ў гэту нядзелю не падвяло, таму на пляцоўцы было даволі людна.
Яшчэ больш людна было пад купалам «Мінск-Арэны». Трыбуны сталі запаўняцца за гадзіну да цырымоніі, а да яе пачатку свабодных месцаў практычна не засталося. Каб гледачы не сумавалі ў чаканні, іх забаўлялі вядучыя і Рысікі — талісманы II Гульняў краін СНД. Да пачатку ўрачыстай цырымоніі для гасцей «Мінск-Арэны» задалі пазітыўны настрой, які ў іх захоўваўся да позняга вечара.
У час цырымоніі на сцэну выйшлі атлеты, трэнеры, валанцёры і іншыя ўдзельнікі Гульняў са сцягамі краін, якія яны прадстаўляюць. Сцяг СНД перадалі Азербайджану — менавіта там у 2025 годзе пройдуць наступныя Гульні краін Садружнасці. А Гульні, якія прайшлі ў Беларусі, закрыў генеральны сакратар СНД Сяргей Лебедзеў. Пасля закрыцця гасцей чакала музычная і танцавальная праграма.
Для гасцей «Мінск-Арэны» была арганізавана імправізаваная дыскатэка. Асабліва ахвотна ўдзельнічалі юныя наведвальнікі, для якіх арганізатары ўключылі ў праграму папулярныя ў моладзі песні. Ад іх не адставалі спартсмены і валанцёры, якія танцавалі ля сцэны.
Мінчанка Таццяна прыйшла на святочную цырымонію з дачкой Дар’яй. Васьмігадовай дзяўчынцы асабліва спадабалася музычная частка і магчымасць патантаваць пад песні знаёмых выканаўцаў. «Дачцэ вельмі спадабалася, я таксама задаволена. На адкрыцці Гульняў мы не былі, таму не можам параўнаць, але сёння ўсё вельмі выдатна», — падзялілася ўражаннямі Таццяна.
Танцавальная праграма паставіла кропку ў цырымоніі закрыцця Гульняў, якая мала каго з наведвальнікаў «Мінск-Арэны» пакінула абыякавым. Хочацца верыць, што гэтыя станоўчыя эмоцыі застануцца з імі надоўга, а самі Гульні захаваюцца ў памяці як свята дружбы, міру і спорту.
БЕЛТА.